28 februari 2012 : Cécemelwandeling

Deistag esset tradiesjoneel (om de viertien doagen) tijd om een avondlijke wandelink te doen mee ‘de Moese Stappers’.
Deze kiêr woarren onder andere : Hilda, Rita, Brigiet & Eric, Sonja & Marc, Sippen, Kris en ikzellef van de partij.
Loatter zou uuk nog Lut de Vos onze rangen vervoegen (toen wal in ‘de Klok’ zaten uiteroard).
We vertrokken iest via de Bliekstroat (langst da wegelken achter Sjalen van Breda) om een korte groet te bringen oan ons nief Djippenasken en kleinkinneken van Hilda : Tjebbe.
Hilda zou trouwes doarveur der nog ene betoallen noar de wandelink, en omda Sonja overlest verjoard was gaaf die der uuk een lappop en watten dus ne goekuupen oavond.

Moar iest vurt mee de wandelink en die brocht ons via tSchipperkapelleken in Grembeirren. Oan die beek (de Vliet zekers) tussen Grembeirren en Am zemmen doar de boan overgestoken (die brugskes doar emmen trouwes al regelmoatig gedoan).
Moar veur we dus den tocht in Grembebeirren gingen oanvangen at de Sippen iest nog iet in zenne rugzak zitten. Volges sommige wasset een fles Cécemel, moar volgens goeje bron trok ze toch miêr op de fles ier niffest.

Via Grembeirren-broek dus(we staken dus nog ies den N41 over) en gingen tein langst den binnendijk tot oan ‘Pietjes’ en doar via den dijk noar Moes, de Kille.
Moar natuurlijk nie direct want ies emmen nog een klein omwegsken gemoakt via de ‘Roggeman’…en tein azzu noar de Kille.
Een bitje loatter zaten win ‘de Klok’, moar doar emmek  al ierder noar verwezen ierboven.

tWas wel spijtig da Yves niet (allei balve wa Sjieps) innuis at om te knabbelen. Gien koasplank, gien weirme plank….. nond zen kluuten dus, alles was blekboar op

tWas toch ne plezanten oavond, en de volgende kiêr goan we woarshijnlek ne kiêr nie op ne deistag wandelen…..wuirt dus vervolgd

17 januari 2012 : Jupiterwandeling

Slechts drie vraan (en zeven mannen) woarren op Moes Duirp te zevenen om te goan wandelen op onze twiêwekelijkse wandelink van de Moese Stappers. Lut kwaam achteraf nog noar de Klok, moar da telt uiteroard nie mee.
Oangezien de Mirabrug te veir es, gingen we deze kiêr noar de Vlassenbroekbrug ….. lost den dijk.
tWas wel goe ka, moar watten der ons op geklied, dus tein es da minder een probleem nou.

En wa uuk opviel was da zuwel Marc de Sippen as Eric M een rugzaksken bij atten. Van Marc weten wal dat doar miestal wel iên of ander flesken mee fruitjaneuvel of iet dergelijk inzit, moar noar da van den Eric woarren we toch wa kurjeus.

Toen we oan de trapkes kwamen (zie uuk de fotto via ®Streetview van ®Google Maps ©)oan het T-kruispunt van de ‘Grootbroekstraat’ en de ‘Karel Eeckhoutstraat’ wasset zover. Doar boven op den dijk stoatter uuk een pikniktoaffel en doar gingen tein de rugzakskes open. Bij de Sippen wasset inderdoad een fruitjaneuvelken en den Eric at één of ander Pools dranksken bij. Ik weet dattet 34° was, moar de noam die wittek ne miêr. Oangezien ik uuk gienen alkool ne miêr mag drinken, weetek uuk nie oe het smoakt. Moar oangezien der verschei een twiede glasken vrogen (en kregen) zallet wel lekker gewist zijn.

Grembergen - T-kruising van Grootbroekstraat & Karel Eeckhoutstraat

Dienen oavond wasset nie alliên goe kaat, doar woarren uuk giel wa sterren te zien. De diskuuse die zich bakkan direct voltrok was natuurlijk of de miest heldere ster veuren ons tein de Poolster (neeje doar eet den Eric M niet mee te moaken) was. Oangezien we richtink Deirremonde oan het stappen woarren, kost da natuurlijk nie. Veur die te zien moeste richtink Am kijken uiteroard. Moar wa wasset tein wel veur een sterre. Mits giel wa overtuiginkskracht en gebruik te moaken van de modernste middelen (azzu iet mee ne nap op, die de sterren en zu kan benoemen), konnen we toch alleman diets moaken datta gien ster was, moar wel de planeet Jupiter (nie te verwarren mee één of ander Belgies bier uiteroard)

We zetten onzen tocht verder en kwamen nog veurbij de Grembeirse woattertoren en de Lomeerstraat – die ons een bitjen dee denken oan Lut, moar tein wel mee een letter verschil En uuk het plein van de voetbal en azzu trokken we terug richtink Moes.
Oan de lichten van rijksweg moakte Rita nog van euren teut, ‘dammen zot woarren’ zeize. Ze dacht dammen overstaken deur het roët, moar het was groen. Toen ze da uiteindelijk deur at, wasset bakkan te loat om zellef nog over te steken. Moar zesser geroakt.

Vannas we goe over den N41 woarren zagen wuuk dat den nenen kant van de boan percies wa nat en aldus vervrozen laag en den nandere kant lag poerdruug. Da spoor van wittek wa liep verder en emmen keunen volgen tottop Moes Duirp….. en doar lieppet nog verder. Wa dattet zjuust was, da weten we nie, moar het zaager nie al te gezond uit.

Zuas gezeet zat in de Klok, Lutgard ons op te wachten en wemmen doar nog gezellig wa keunen naproaten en onnuuzelheid verkuupen gellek we gewend zijn.

In het noar huis rîjn eet Eric M nog vriendschap willen sluiten mee onderstaand gezelschap. Moar de zjuuste toedracht zeude em zellef moeten vroagen, peizzek

6 December 2011 : Moes – Grembeiren – Am – Moes

Weer te zeven verzoameld mee de Moese Stappers en van deeze kiêr woarren we schuun verdiêld : zijnde vier/vier. Op teinde van de wandelink zaten der van deze kiêr al twiê oppons te wachten : Lutgard me van deze kiêr Heleen doarbij. As da zu vurt goat, keumen misschien beter van nieste kiêr int café stappen in ploats van te goan wandelen.

Deze kiêr gingen we richtink de Kille. Die kennen we natuurlijk nog van vroeger, toen we doar regelmoatig zaten bij R-man & D-zie. Moar die weunen doar ne miêr, we zeun zies moeten goan bezoeken op euder nievve stek opt Boseirf peizzek…… rond Nievvejoar tein keumen ze vannieste kiêr een goe joar wensen en emmen uuk een alibi om der ientje te meugen drinken. Ge kent ons, een goe reden om te drinken es bij ons rap gevonnen

Moar vurt mee mijn roet, want we gingen lost den dijk noar Grembeiren. Richtink Pietjes dus.
Doar een bitje verder da wegelken in en tein tot oan die schuilhut oan de Pielleput. Kzou ier anders een fottooken van Streetview® bijzetten, moar euder ottoken es zu veir blekboar nie gereen. Kem tein moar het koartjen ier bijgezet. Woar datta roêt bolleken stoat, esset.

Op de ploats van da bolleken vinde een schuilhut die blekboar uuk veur andere dingen wuirt gebruikt

Doar in die schuilhut emmen efkes geschuild… en wasset weer ies tijd veur de Sippen zijn rugzaksken (veur wie het verslag ier onder gelezen eet, die wit tein al genoeg, veur dandere : het was vanillejenever van deze kiêr).
Tein verder, niffest de Pielleput en azzu noar de Denstroat. Tein keunde een boantjen volgen, vlak tegen de Rijksweg en da luupt verder tot in Am.
Doar emmen ies tot oan de meulen gewist. Allei we zagen em stoan, en ij mook volges ons vitteveel lawijt en tein zijn we moar richtink contenerpark getrokken. We dachten iest datta nog open was, moar da bleek nie te kloppen. Doar brande wel nog licht, moar twas nie miêr open. Blekboar woarren ze het vergeten uit te doen.
Tein verder richtink Schipperskapelleken, tein het Spernhuis en azzu noart Keirrekof. Langs het Keirrekof geluupen. En zu emmen keunen zien da Mauriesken zen stuirt eindelijk opgekuist es, da wier uugen tijd peizzek.
En tein via de Blommekestroat en het Stroatjen noar het Duirp….. woar da Lutgard, Heleen, Jezus & André en nog een poar andere ons zaten op te wachten en we via Johny der nog wa keunen drinken emmen.
Der es uuk al afgesproken dammen den derden januari goan eten (bij de Miel woarschijnlek) en veur de rest ziemmen wel.

13 september 2011 : een ‘Klok’-wandeling

Toen we viertien doagen geleen in Woasmuistern atten wisten wandelen, woarren wovereen gekommen dammen veurluupig(?) onzen dag van de wandelink van de ‘Moese Stappers’  nie gingen verleggen en we wel iet zoun vinnen woar dammen mee onzen uup binnenkonnen op deistagoavond.

Verzoameld wierrer dus deeze kiêr nie op de Kille moar wel oan den tjoutter (das dus de kiosk dasse zeggen). Kem hieronder nog een fottooken gezet uit december 2009

onzen tjoutter

We zoun noar de wandelink wel zien of dammen ier of doar nog binnen mochten.
De wandelink gink onder andere veurbij azzu wa ploatskes diegge uuk at moeten doen mee de zoektocht van de gemiênte en onderwege wierrer dus giel wa gedieskusjeert over de meugelijke antwoorden.
De formulieren moesten tein uuk azzu wa binnen zijn dienen dag….. moar iedereen at da blekboar al gedoan, dus die dieskuusse was in feite al te loat.
En as we de juuste (allei volges dinrichters uiteroard) antwoorden krijgen zeumen wel zien wietter eventueel gelijk at …… of zjuust nie.
Moar uuk ne giellen boel andere wegelkes wierren bezocht om uiteindelijk terug opt duirp te geroaken en watten sjans……’de Klok’ was nog open en mijne gebuur : de Johnnie, was zu broaf(?) om ons te willen bestellen.

Dus doar emmen we nog wa keunen drinken en uuk wa keun smikkelen en den oavond was weer op een leutige manier gepasseerd.

22 juli 2011 : Fietsen met KWB Am-Center(7)

Ik at wa loat gezien dattet bakkan zeven uur was en ik dus in zeven oasten noar Am, richtink Renielde.
Toennek doar toekwam woarren zallop en weg, moar gelukkig was Julien doar nog om mij der op te wijzen dasse richtink Grembeirren oan het rijn woarren via de gruute boan.
Ik kat zal ga ingoald, en we zijn tein ons gevijven vurt gereen richtink Moes en Grembeirren. Deur mijn kennis van de wegekes deur de vele wandelingskes en fietstochten emmek euder wa boantjes keunen loatten zien woardasse dus nog noeit gewist woarren.

Uiteindelijk tein op den dijk geroakt …. en van doar richtink Kastel gereen….. bij de Miel, int Vissershof (die Ammeneirs goan doar percies geirren en de Miel zieze geirren kommen).
De Miel at uuk weer iet nief zeittem : “ne verliegden Vicaris”. Da was (althans volges de Miel) den trieppel van Vicaris woar dattem iet bij deet uit een vatjen da in een kartonnen duus zaat  en de pressing uittet bier hoalde en ge bekwaam tein een soort van wietbier da moar 5,5 groaden nie mier wa in ploats van de normoallen 8,5.
Of zuiet datter op trok …..
Oe het zjuust allemoal in zijn weirrek gink, da wittek uuk nie en de Miel zenne uitleg moakte het uuk nie echt mier duidelijk….. moar da ligt uiteroard oun mij.
Moar ik peis ierder dattet de nieven Vicaris 5 (kem ies gegoegeld enk zen vrij zeker dattet da was)was die em ons liet proeven.

21 juni 2011 : Avontuurlijke wandeling in Grembergen en contreien

We vertrokken mee de ‘Moese Stappers’ alweer oan de Kille ietsken noar de zevenen en azzu noar de Roggeman….. toen we doar liepen kregen wuin berichtjen van ons Sonja dazze oant kommen was (normoal gezien loatte da toch nie weten via den tellefon, zoun ne mins peizzen moar tsegeworrig mee die moderne toestanden allemoal zetten ze da gewoên op feesboek offop twitter ….. woar goat de weireld noar toe)
Moar het bleek alras dasse iet anders bedoeld at en bij de groep wou oansluiten,…. om mee te goan stappen dus. Wij dus efkes gewacht totser was en tein vurt op trot via de tramroet en dergelijke richtink Grembeiren.

Onder de boan oan den Eric M. nog wa wegelkes lierren kennen (hij weunter nochthans dichtst bij, hij kander bij manier van spreken in piessen vannin zennen hof) … ne mins es noeit taat om iet te lierren noû

Onderwegen moesten der sommigen nog wa onnuzelheid verkuupen, moar da zemmen uiteroard al gewoên.

En wuurden uuk nog ne luide gil van ons Heleen…..
bleek datter ne puit eur wou kussen, omdattem woarschijnlek dacht datter een prinses veuren zen deur kwaam…..
en astje die tein kon kussen, tein wierrem misschien prins…..
of azzu iet moet da toch gewist emmen. 
Moar Heleen es uiteroard gien prinses, ….. nog nie, …. moar wa nie es,……
zes wel van adel, euren offiesjelen noam es HELENA VAN SPERMA(of wasda PARMA ?) DE BRICALJON DE STEENOKKERZEEL  

Wuurden uuk nog een sappig verhoal van Erik C (dienen mins weirrekt in de kliniek) over ne petanquebal diesse eirgens ingestoken atten, en der nie mier uitkrichten (mier detaais goannek euder bespoaren, moar as ge mij tegenkomt moogde mij der attijd om vroagen uiteroard).

Nog wa fottookes hieronder om tees berichtjen te vervolledigen uiteroard.

p.s. : den tocht eindigde zuas gewoênlijk uuk op de Kille, woar we bij R-man en D-zie toch attijd goet gesteld zijn……der wier uuk nog een afsproaksken gemoakt om de noste kier ies te goan per vélo rijn in ploats van te stappen…… we zien wel

Oan de Roggeman stoan we te wachten op Sonja…..

….. woar bleft die tr….. (graptjen hé !!)

Eric M & Djo inspecteren de Vliet(allei da denken ze toch)

brug oan de grens Am-Grembeiren

es iedereen der ?

Veur wattet moet dienen, da weten wuuk nie

Awoehaha (of iet in dienen oard) ……… Tarzan in Grembeiren Broek dus

puit die prinses Heleen wou kussen

terug noar uis

31 augustus 2010 : Dijkenwandeling

Het was weer eens deistagaovond, dus was het weer ies den tijd da de Moese Stappers euder viertiendoags wandelingsken gingen moaken. Ter was terug wa vollek oanwezig, tverlof es veur de mieste veurbij. En zelfs de Clémang was van de partij. Hij at het verslag van de veurige wandelink gelezen en dus gingen we vandoag een poar wegelkes verkennen die we mee de Moese Stappers nog noeit gedoan zoun emmen.
Vertrekken op de Kille, da kennen we natuurlijk al langer. En uuk het stiksken deur de Roggeman stond al menigmoal opt program.

Neeje het was veural eens we ‘Pietjes’ gepasseerd woaren dattet nief zou beginnen. Doar pakten we ne kier nie de gewoene wegelkes diemen alted doen, moar gingen veural op de binnendijkskes van Grembeiren luupen.

Op de Grembeirse dijken, terwijl de zunne ondergoat....

Buiten dammen op den dijk liepen in ploats van der niffen, wasser echter nog nie veel nief oan. Moar da zou wel kommen toen we de Voortweg bereikten via de boskes oan den N41. We liepen richtink Grootzand, moar zoun doar natuurlijk nie kommen, want op teinde van de Voortweg, vlak veuren dagge in duizen komt, gingen we doar ne zijdijk op. En doar atten de mieste Stappers nog noeit geluupen (den deezen wel natuurlijk)

In den achtergrond ziedde de woattertoren van Grembeiren

En doar stonden tein wel wa tingels en destels. In feite iet te veel noar mijn goestink, as ge wit dannek gien lange broek oun at…… dus liettek de rest wa veur luupen zuda de mieste tingels al plat getrapt woarren. We moesten uuk een poar kieren een hekken of puurtje veur de schoapen passeren…. moar die gingen makkelijk(?) open en dicht. Dus da was nie echt een probleem.

Een puurtjen of een hekken aat ons nie tegen hé

Twie kieren kruisten we een verheirde boan en twie kieren wou den Eric (van Debbe) doar al links afsloagen, “Want da was dichter” zeittem. Hij dwoalt natuurlijk, want die boantjes luupen duud. (Keb da opt da koartjen spesjoal veur em oangeduid int roed)
Bij de passage van de derde kruissink atten we wel links keunen afsloagen, moar zuas ge opt koartjen keunt zien es da uuk gienen meter gewonnen.
Al den tijd dammen over die dijkskes liepen wiesten ons vraakes in de verste verte nie woar dammen ergens uithingen, moar zudra dammen op den gruuten dijk woarren en oan Vlassebroekbrug gepasseerd woarren, zetten zeuder in een huugere versnellink en pakten direct ne serjeus veursprong. Zatten duist woarschijnlek.

Wij wiesten natuurlijk beter : tes nog ne gielen end vandoar noar ‘Pietjes’ en tegen dammen doar oankwamen hong euder tong al tot op de grond en was de mieste fut der al uit ……en we moesten nog verder noar de Kille.

Doar bij R-man & D-zie wier natuurlijk nog serjeus nagekoart en wierter uuk al afgesproken dammen de noste kier noar het sjokolatduirp goan. De Clémang zen Hilda (uuk nog Hilda van de Baronnes genoemd) es vandoar afkomstig en zemmen doar uuk nog nen tijd geweund. De ‘zotten’ van Wies zen dus bij deze gewoarschuwd. Al esset uuk mogelijk datter nie teveel vollek goat zijn, want nie iedereen wasser content over de zwoartte van den tocht van vandoag……. Watjes zijnnet

Die rode vierkantjes es om oan den Eric te loaten zien da die boantjes duudliepen

De route stoat uuk op tinternet (op de saait van www.routeyou.com )

27 augustus 2010 : Born in 60 Party

Op de vrijdagoaovond(noar Katuit) woarren we deur de Stiene uitgenuudigd om noar heur fiestjen te kommen.
Zij, soamen mee drei (Carine – Veerle & Koen), vieren dees joar euderen veftigsten verjoardag en doarveur richten ze dus een fuifken in (zemmen da trouwens tien joar geleen uuk al ies gedoan, moar tein veur euderen viertigsten uiteroard).

Watten afgesproken om soamen te kommen op de Kille (bij R-man & D-zie) en iedereen mocht em verklien in wattem zellef wou.
Op duitnuudegink stond : dresscode sixties-rockabilly, moar da es natuurlijk ruim interpreteerboar.
Het viel onmiddellijk op da een bepoald kleken(roos mee wiette bollekes) en Elvis(in alle kleuren) percies wel vried populair woaren.
Anderen woarren noar ne winkel goan huren of atten iet uit euder eigen kollekse oangetrokken. Der wieren uuk al links en rechts wa lappen opgegeven. Zu wierter gezeet dak percies op Peter Goossens trok. “Dienen kok hé” zein zer nog bij, “nie dienen zanger van Leopold III”. Kem euder nog gezeet da dienen zanger anders noemt (Erik dus), moar ze geluufden mij weer nie….. hoe es da meugelijk hé
We konnen noar Grembeiren, want doar stondet te gebeuren.
Doar in de Rootjesweg (in de gemienteschool) wasset te doen. Normoal gezien ginder al een frietkot geried stoan, moar da was wa verloren gereen.
Moar nie getreurd wemmen een tetje loatter vollop keunen genieten van de lekkere frietjes en currywuisten. (een goe iniatief trouwes)
Der wier van verschei nen fotto gepakt bijt binnenkommen ent fiestjen kon beginnen.

Esda nou nie juust Peter Goossens mee Sonja & Lieve

Dieste onderbrekink was veur de feestveirrekes van dienst. Ze lein uit watter dienen oaovond allemoal te gebeuren stond en tein konnen we der dus veurgoed invliegen.

De rest van den oaovond emmen ons dus gammezeerd mee :

• een wedstrijd veur den best verklieden (trouwes gewonnen deur onder andere ne rozen elvis)
• een danswedstrijd : woar da iedereen ‘verplicht’ wier oaan mee te doen en de slechst dansende koppels wieren één veur één van den dansvloer gestuurd… alhoewel ne kik nie kan dansen, emmen da nog toamelijk lank volgaan. Moar da zal wel Lieve heur verdienste gewist zen en nie de mijn
• veel dansen en lol moaken
• …… en af en toe wa drinken of wa friet in ons gonaden sloagen.

‘t Fiestjen was dus mier as gesloagd en ze mogen da nog doen.

Spijtig genoeg wassek mijnen kodak vergeten en emmek dus gien fottoos keunen trekken.
Anderen emmen da wel gedoan en zu stoan die van Sonja Coen en Anouk Verhelst (woar dak trouwens uuk bovenstoande fotto goald em) op euderen feesboek (ge moet moar ies goan zien). En as ge nog nie op feesboek zit….. tein wuirret dringend tijd dagge da doet hé

13 april 2010 : Op stap met “de Moese Stappers”

Het was al ne giellen tijd geleen, moar kzen nog ies op stap gewist mee “de Moese Stappers”. Ik stoan de leste monden veural mee de loatten, en tein bennek moar om een uur of negen thuis en kannek dus nie meegoan mee die gasten. Ik goan tein wel nog ies noar de Kille, moar het ‘echte’ stappen blijft tein wa achterwege en dus zaagde hier gien verslagskes ne mier verschijnen.
Giesteren stonnek mee de vroegen en attek allen tijd om der tegen de zevenen te zijn en mee te stappen. de Clémang moest noar een fiestjen en kon dus giennen tocht uitstippelen en wier da overgeloaten oan Marc de Sippen. De Marc vond datter de leste weken moar zwak gepresteerd was kwa wandelen en da de Clémang een serjeus ‘mietjen’ oant wuirren was en dus wasset dringend tijd om der ies een goe lap op te geven.
En ze zeun het geweten emmen….. mier as twie uur stappen oan ne tocht van mier as elf kielometers. En normoal gezien wasset nog verder gewist, moar de vraan (Heleen, Lut, Sonja, Brigiet en Det) woan op ne bepoalde moment nie mier verder…… en dus emmen der wa afgenepen. Uuk bij de mannen (Morris, Frank, Djo, Erik & Eric) vonnen der da de Sippen en ik dik oant overdrijven woarren….. moar ze dwoalen uiteroard.

Wie de tocht ies in detail wil bekijken, die klikt moar opt koartjen en doar keunde tein noar harte in en uitzoemen en switchen tussen luchtbilden en dergelijke.

Noar den tocht emmen we nog wa nagebabbeld bij R-man & D-zie. De ‘vettige’ proat was weer nie uit de lucht….. en zelfs de Clémang kwam nog ies af, moar kon uuk het nievoo nie mier omhuug krijgen, in tegendeel zelfs

We zen uuk al in volle veurbereidink van onzen tocht mee dezels in Frankrijk die noste mond mee sinksen zou vertrekken. Loater hierover meer.

10 november 2009 : de Moese Stappers in Grembergen

De Moese Stappers gingen vandoag moar een kuirt wandelingsken moaken. De vraakes en den Eric woaren al wa moe. Althans da was de bedoelink, uiteindelijk bleeket nog een serjeuse wandelink te wuirren.
Iest langst den dijk richtink “Pietjes” en doar tein een bitje verder het Grembeirse broek in te duiken. We passeerden aan menige visput, allei da peizzen we toch….. want het was al pekkedonker toen we vertrokken.
We stevenden recht op den N41 af, die we overstaken, om een wijle verder weer het Grembeirse broek in te duiken. We kwoamen uiteindelijk in de Voortweg uit en langs den Vossenhoek en wa gruute boan trokken we richtink Grembeiren-duirp.

Moar oant stroatjen van woar de woattertoren stoat trokken we noar het plein van SK Grembeiren, om doar rond te trekken en vervolgens doar in de Goaverstroat uit te kommen. De boan doar overgestoken en noar de nieve huizekes in de wijk doar goan kijken. Doar deur getrokken zu dagge in de Langestroat uitkomt. Kweet wel datta nou de Oude Molenstroat es, moar op Moes eede nog altijd den Bokmeulen, den Niestad en zu verder in mijnen soms wa benevelde geest.
Doar oan da bordjen mee “melkautomaat” da stroatjen ingetrokken om verder vlak veur da bosken da wegelken te volgen zu dagge oan de N41 terug uitkomt en doar weer overgestoken.
Vervolgens noar het Pijnbroek te trekken en zu via het Pachtgoed en Debbe terug op de Kille te geroaken.
En vant wiekent trekken we noar Dardennen, naar Hastière mee daat leidink.

Veur diegene die euder afvroagen wa die Sjieneese telluur hierboven stoat te doen….. noar het schijnt gebruikt den Eric da om wa lawijt te moaken azzet wa stillekes in huis es.
Of zouttem mier iet bedoeld emmen gellek hieronder.